Alexa Unica Radio
topo nitella

Prendas de Sardigna: su Sòrighe de padente

Est noa de sas dies coladas, su 24 de martzu, chi Marco Marrosu, classe 1972, naturalista tataresu espertu de escursiones a logu de monte e de iscalada isportiva, nche nd’apat sejadu unu grustigheddu.

Mama e babbu cun sos minoreddos, chi s’ant fatu su nidu in costas de su Monte Oddeu, in su sartu de Durgali. Sende cosa bastante rara, at invitadu totu sos amantiosos  – dae sa pàgina sua de facebook – a non carcare cussas giuras, nessi fintzas a su 20 de maju, cando sos minoreddos ant a èssere a tretu de si mòvere a sa sola, sena s’agiudu e s’amparu de sos mannos. Sunt prendas, ùnicas e de grandu interessu iscientìficu in prus chi no umanu e, si cherimus servare e sarvare, in logu nostru, su chi nos abarrat in contu de natura e de ambiente, diat èssere cosa bona a l’ascurtare.

Su sòrighe de padente est una criaduredda minuda chi nche crompet, in edade, a pagu prus de 25 tzentìmetros de longària, cun totu sa coa. S’orìgine zoo-geogràfica sua est  Paleàrtica, diat èssere Europa, Àsia e su nord de s’Àfrica, una de sas eco-partes in ue ant partzidu su sistema biològicu terrestre. Sa  presèntzia sua in Sardigna nos nche torrat a su Pleistotzene, rugrende su  ponte sardu-corsu-toscanu. In colore de ruìngiu, mescradu a biancu e a nieddu, tenet ogros maduros cunforma a sa mannària de sa conca e unu bruncu puntudu cun nares in colore de rosa. Andende est curiosu ca non caminat, ma isghelat semper a brincos prus o mancu longos cunforma a sa presse.

Eliomys quercinus sardus
Phylum: Chordata
Classe: Mammalia
Òrdine: Rodentia
Famìlia: Myoxidae
Nùmene sardu: Sòrighe de padente; Topi de mata; Topi de sonnu; Sorigheàlzu

Animale raru e in arriscu de estintzione, est amparadu, in prus chi non dae sa lege italiana e regionale sarda, dae sa Cunventzione internatzionale de Berna (lege 503/1981, allegadu III). 
Sos inimigos naturales suos sunt s’astore leporàrgiu e su margiane, ma su peus est a sa segura s’òmine derruende·nche·li  s’habitat, siat tallende in cherta de linna, siat ponende a fogu su padente. Acontesset de nd’addobiare unos cantos esemplares, mesches perrichende dae pala in sedda peri sos montigros de su sartu.

About redatzione sardo

Redatzione chi s'òcupat de sas notizias in limba sarda in su portale. Cultura, eventos, tzìnemas, ispetàculu e teatru sunt sos argumentos tratados.

Controlla anche

mixer limba sarda

Novas in terra nosta de su 16 de mes’e argiolas de su 2021

De su lunis a su cenabara a is dei de mengianu e in replica a …

Lascia un commento

Il tuo indirizzo email non sarà pubblicato. I campi obbligatori sono contrassegnati *