Unu dispositivu chi s’assimìgiat a una pinna, chi at a permìtere a sos chirurgos de torrare a fàghere sa trama de sos ossos
Unos cantos sientziados australianos ant imbentadu unu dispositivu chi s’assimìgiat a una pinna, chi at a permìtere a sos chirurgos de torrare a fàghere sa trama de sos ossos in sas pessones chi tenent lesiones graes. Sa pinna biològica amaniada in s’Universidade de Wollongong at a èssere adata mescamente pro sos chi ant tentu intzidentes de màchina, at naradu Peter Choong, de su “Tzentru de Etzellèntzia pro Eletromateriales” de s’ateneu, presentende unu protòtipu. Su dispositivu l’ant a perfetzionare in s’ospidale St Vincent’s de Melbourne, in antis de l’isperimentare in sas pessones.
Su dispositivu emitit trama tzellulare cun unu mètodu chi s’assimìgiat a s’imprenta 3D, boghende a campu pìgios de materiale tzellulare pro prenare sa setzione de s’ossu chi at tentu dannu.
In custa manera permitit de fàghere impiantos a mesura cando si faghet un’interventu chirùrgicu, boghende·nche sa netzessidade de nche tirare sa cartilàgine e de la cultivare pro chidas in laboratòriu, pro sustituire sa trama chi at tentu dannu o chi est malàida. “Cun custu dispositivu su chirurgu podet dolare e torrare a fraigare, duncas personalizare, sa trama chi devet acontzare”, at craridu s’ispetzialista.