Antoninu Rubattu binciadat
su primu prémiu a su VII^ Cuncursu Nassionale de Poesia Dialettale “ROMA OGGI” cun Tilingiones

Custa sa poesia dialettali Tilingiones chi binciri sa medàglia d’oro de su Presidente de sa Repùbblica – Roma 1978-79

Tilingiones semus, tlingiones ebbia,
cravados in custa Terra ‘e calarighes
ch’andana feri-feri, che upas malaittas,
peri calancas, pelcias, mudejarzos
in chirca ‘e bi surzire carchi uttiu
chi siat istuppinzu a isperas noas!

Terra sicca, niune la nèada!
Nois però ojos e suilcos
benosos los tenimos da-e sempre
e suore e piantu
aundan che trainu manantiale
sas dies nostras, finas a las marzire!

Cale istintu nos ghiat? Cale istintu,
si chertana sos laores cun su sole,
e nois los abbamos, notte e die,
cun su sambene nostru allentoridu,
cun bèlidos de anzones argasadas
in iscias de riu chena recatu!

Cale deus nos giuat? cale deus,
si a s’intirinada solu appena
nos ammacculiamos
acchèssidos, isfattos,
a pês de sos Nuraghes chena tempus
chi nosi s’addulzin donzi sero
in su nos bider, che suerzos, siccos!

Sa sorte nostra est sorte ‘e tilingiones!
Da-e tempos e temporios nos lu nêsini
janas e iscurtones de Ichnusa
bessidos in sa notte
cun accias de nìbaru in sas manos!
Surdos pedrales non los iscultemis,
ne appoi ‘e mill’annos bi creimos!

E sighimos, ottora sighimos,
azzurridos,
a nos affungare sempre ‘e piusu,
ca pius forte ‘donzi tribulia
est sa rocchella nostra  ‘e b’agatare
de paghe, prima o poi, unu lughinzu.