Home / Articoli / Altro / Sa Paristoria de Norax in is arrocas de Chia acanta de Pula
Unica Radio App

Sa Paristoria de Norax in is arrocas de Chia acanta de Pula

Norax, biendi cuss’omini, mannu coment’e a dus ominis de is chi biviant in sa terra de Sardignia

In d- una noti prena de bentu, su mari fiat aici inchietu chi is undas atidhànt comenti chi fessint cuadhus stallonis, in is arrocas de Chia acanta de Pula in Norax. In mesu de cussas undas dhoi fiat una barchixedha, chi andàt de unda in unda comenti chi fessit un’arrogh’e palla stragau de su bentu. Su marineri, disisperau, no sciiat prus comenti fai po fai in manera de no morri allupau, finas a candu, un’unda prus manna de is atras, aiat pigau sa barca e scuta nci dh’aiat in mesu de s’arena bianca coment’e su tzucuru.

Spantau de sa fortuna chi aiat tentu, su marineri, bintu de sa grandu stanchesa, si fudi lassau arrui in s’arena e dromiu si fudi. S’incras a mengianu, su mari si fiat calmau, ma su marineri, ancora stancu, fiat abarrau dromiu.

Pustis de unu pagu, fiat benia a passai sa filla de su rei de is pastoris, Su nomini cosa sua fiat Nora e fiat tropu, tropu bella.

Nora, biendi cuss’omini, mannu coment’e a dus ominis de is chi biviant in sa terra de Sardignia, cun is pilus a color’e òru, si dhi fiat incrubada acanta de  po dhu biri mellus e po dhu tocai.

Scidau, su marineri, aiat castiau cussa bellesa de picioca e aiat provau a pregontai calencuna cosa, ma is dus no si cumprendiant, ca poita fuedhànt diferentis linguatzus. Pustis a fortza de acinnus e de iscriri in s’arena, is dus si furint cumprendius e Nora dhu aiat acumpangiau a su dominariu aundi biviat issa.

Biendi custu foresu arribendi cun sa filla de su Urrei cosa intzoru, is pastoris aiant cumintzau a dhi fai modas bellas, dhi aiant donau cos’e papai, pedhis po si bistriri e dhi aiant donau una pinneta po pori dromiri arreparau. Su marineri, cuntentu, aiat cumintzau a imparai s’arti de su pastori e aiat cumintzau a traballai cun totu is atrus.

Ma una bella dì, candu totu is ominis furint in is montis a pasci is brebeis, de mari furint arribadas una cedha de navis de is Saracenus. Is calis armaus de ispadas, flecias e lancias, furint calaus a terra po furai e po bociri.

Is itzerrius de is femminas e de is pipius aiant fatu in manera chi is ominis si ndi sapessint de su chi fiat sutzedendi e, lassau su bestiamini, aiant cumintzau a curri. Ma su prus lestru de totus fiat istetiu su foresu, su cali, armau feti de unu picu, aiat cumintzau a bociri una cedha de Saracenus, finas a candu fiat arrenesciu a nci dhu sus fai fuiri a coa pesada. Ma is Saracenus aiant acutu a distrui totu is barracas de is pastoris e su foresu, biendi su disisperu de Nora, si fiat fatu tzerriai Norax, chi bolit nai “su chi scrufit a Nora” e aiat propostu a is atrus pastoris de torrai a pesai is domus, ma imperendi feti pedras, po fai in manera chi nemus dha  sas podessit distrui.

Aici Norax cun is atrus pastoris, aiant cumintzau a tragai pedras e pedras e aiant cumintzau a fai una domu manna, po dhoi capi totus, cun turris artas po biri is nemigus de atesu e fata in manera chi nemus dhoi podessit brintai o dha podessit distrui. In pagu tempus, is pastoris, aiant imparau a pesai turris de pedras in dognia logu, fendi aici in manera chi is femminas e is pipius podessint bivi in trancuillidadi.

Custas domus furint istetias tzerriada Nuraxis, po torrai onori a Norax chi dhus aiat imparau a dha sas pesai.

Listen Unica Radio on Spotify

About redatzione sardo

redatzione sardo
Redatzione chi s'òcupat de sas notizias in limba sarda in su portale. Cultura, eventos, tzìnemas, ispetàculu e teatru sunt sos argumentos tratados.

Controlla anche

A Cagliari torna Monumenti Aperti: 75 siti sotto i riflettori

Per il capoluogo sardo un intero weekend dedicato ai Monumenti Aperti della città, con seimila …

Lascia un commento

Il tuo indirizzo email non sarà pubblicato. I campi obbligatori sono contrassegnati *

Questo sito usa Akismet per ridurre lo spam. Scopri come i tuoi dati vengono elaborati.